Përshtati në shqip për “Shendeti.com.al“: Blertina Koka
Ju kujtohet sfida më sensacionale e vitit 2014, “Ice Bucket Challenge”, që tërhoqi vëmendjen e njerëzve në të gjithë botën dhe vuri para përgjegjësisë të njohur dhe të panjohur?
Një kovë me ujë dhe copa akulli vuri para përgjegjësisë shumë personalitete të shquar të botës së artit, muzikës, sportit, teknologjisë, të huaj dhe shqiptarë, të cilët iu bashkuan sfidës duke pranuar të lageshin me ujë me akull dhe të dhuronin para për të sëmurët me sklerozë.
Sfida u krijua për të mbledhur donacione për gjetjen e një kure për sëmundjen ALS, që në shqip quhet Skleroza Laterale Amiotrofike SLA (e njohur ndryshe dhe si sëmundja e Lou Gehrig, lojtarit të famshëm të bejzbollit).
Kjo fushatë mblodhi më shumë se 100 milionë dollarë për 30 ditë dhe mundësoi nisjen e një sërë projektesh kërkimore në të gjithë botën. Një nga këto ishte Projekt MinE, e cila u mundësua falë kontributit prej 1 milion dollarësh nga Shoqata ALS.
Hulumtuesit shkencorë të këtij projekti njoftuan të hënën se kanë identifikuar një gjen të lidhur me këtë sëmundje, ku, sipas ekspertëve, mund të ndihmojë në gjetjen e një trajtimit të ri.
Skleroza Laterale Amiotrofike SLA është një çrregullim neurologjik ku neuronet motore, qelizat nervore që kontrollojnë muskujt, funksionojnë shumë ngadalë. Sëmundja mund të jetë sporadike ose e trashëguar, dhe për asnjërën nuk ka akoma asnjë kurë. (lexo më shumë këtu)
Sipas ekspertëve, zbulimi i këtij gjeni të ri i ndihmon që të kuptojnë më mirë sëmundjen e sklerozës. Gjeni më i ri i zbuluar, NEK1, është i lidhur vetëm me 3% të rasteve ALS, por është prezent në të dyja format e sëmundjes, si e trashëguar ashtu edhe sporadike, dhe u jep shkencëtarëve një shënjestër të re për zhvillimin e trajtimeve.
Në studimin e publikuar të hënën tek revista “Nature Genetics” kanë marrë pjesë më shumë se 80 hulumtues shkencorë nga 11 shtete të ndryshme të botës, të cilët kanë renditur gjenomet e 15 mijë njerëzve të prekur nga kjo sëmundje.
Ky zbulim është i rëndësishëm, thotë Brian Frederick, zëvendës presidenti ekzekutiv i komunikimit dhe zhvillimit tek “ALS Association”, “sepse na ndihmon të kuptojmë çfarë e shkakton atë dhe çfarë trajtimi mund të gjejmë”.
Burimi: The Guardian / https://shendeti.com.al/
