Përshtati në shqip për gazetën “Shëndet+”: Blertina Koka
“Të gjitha organet pushuan së funksionuari, ndërsa zemra nuk pushonte. Për 30 minuta …zemra e tij vazhdoi të rrihte. Një gjë të tillë nuk e ka parë kush deri tani. Një testament i vërtetë i forcës së shpirtit dhe vullnetit të tij”. Kështu ka treguar vajza e legjendës Muhamed Veli, Hana, e cila ka ndarë me publikun e gjerë çastet e fundit të të atit.
Legjenda e boksit ndërroi jetë në moshën 74-vjeçare nga një gjendje shoku, për shkaqe natyrale ende të paspecifikuara. Për 32 vite më radhë ai ka vuajtur nga sëmundja e Parkinsonit, ndërsa prej të hënës ka qenë i shtuar në spital për shkak të problemeve me frymëmarrjen.
Familja e tij tregon se kampioni i peshave të rënda në boks nuk vuajti në çastet e fundit, por u nda nga jeta qetësisht. Ai kishte kërkuar që të gjithë njerëzit që i kishte takuar gjatë jetës të vinin në varrimin e tij, pasi ishte një qytetar i botës.
Vajza e tij Hana ka treguar nëpërmjet një postimi në Twitter momentet e fundit të të atit dhe ka falënderuar të gjithë njerëzit për mbështetjen e tyre.
“Zemrat tona janë duke vuajtur në këto momente, por ne jemi të lumtur pasi babai tashmë është i lirë. U përpoqëm të gjithë që të qëndrojmë të fortë dhe i pëshpëritëm në vesh “Mund të shkosh tani. Do të jemi mirë. Të duam. Faleminderit. Mund të shkosh tek Zoti tani”.
Të gjithë i qëndruam pranë, duke e përqafuar, puthur, duke ia mbajtur duart dhe duke kënduar gjithashtu lutje islamike”, ka treguar Hana nëpërmjet postimit në Twitter.
Burimi: Daily Mail / https://shendeti.com.al/
