Për gazeta “Shëndet+”: Dr. Adriana Lapardhaja/ Dr. Evis Sinjari
Zbuloni 7 mite dhe të vërteta rreth diabetit. Shfletoni galerinë…
Miti i parë: Në qoftë se unë paskam pasur diabet, duhej të isha në dijeni, pra duhej që ta dija
E vërteta: Mendimi juaj në pamjen e parë është shumë i drejtë, por duhet të keni parasysh se në disa raste kjo sëmundje paraqitet e heshtur, pa shenja të bujshme. Ka një thënie në fushën e diabetologjisë: “Gjysma e njerëzve që aktualisht vuajnë nga diabeti, as që e dinë që janë diabetikë! Gjithashtu, gjysma e atyre që janë në dijeni të diabetit të tyre, nuk e mjekojnë atë, ndërsa gjysma që e dinë se kanë diabet dhe mendojnë se e mjekojnë atë, mjekimi nuk është në përputhje me standardet e kërkuara”.
Dukuria e mosnjohjes së diabetit ndodh pasi në organizmin tuaj vërtet mund të jetë shfaqur diabeti dhe vlerat e glukozës në gjak janë në përputhje me kriteret diagnostike së sëmundjes së sheqerit, por jo aq të larta sa të shkaktojnë shenja klinike. Si rregull, shenjat klinike klasike të diabetit, si etja, pirja e ujit në sasi më të madhe, urinimi i bollshëm dhe i shpeshtë, oreksi i shtuar dhe pakësimi i peshës trupore, shfaqen kur vlerat e glukozës në gjak janë mbi 200 mg/dl. Kjo është edhe në varësi të pragut të veshkave për glukozën. Kjo do të thotë që, në qoftë se niveli i sheqerit në gjak është mbi 180 mg/dl, glukoza fillon të shfaqet në urinë, në të kundërt veshka nuk e lejon glukozën të mënjanohet nëpërmjet urinës. Shfaqja e glukozës në urinë është dhe shkaku i të gjitha shenjave klasike të diabetit. Nga ana tjetër, duhet të dini se çdo person, me apo pa diabet, ka një prag të caktuar dhe personal (të veçantë) të veshkave për glukozën, që luhatet nga 120 deri në 200 mg/dl. Kuptohet se, nëse pragu i veshkave është i lartë, glukoza nuk lejohet të eliminohet nga veshka, pra edhe shenjat klinike klasike të kësaj sëmundjeje nuk do të shfaqen. E rëndësishme është të njihet se, edhe nëse diabeti mund të mos ketë shenja klinike, ai ka filluar në trupin tuaj dhe me kalimin e viteve mund të shkaktojë ndërlikime në enët e gjakut apo nerva. Kjo është arsyeja përse Shoqata e Diabetit këmbëngul të depistohet diabeti në njerëzit në dukje “të shëndetshëm” nëpërmjet matjes së glukozës në gjak.
