Mjedisi ka kushtëzuar gjithmonë shumë apo pak në mënyrë të drejtpërdrejtë statusin e shëndetit të njeriut. Prej gjysmës së dytë të shekullit të 19-të, me revolucionin industrial, ajri ka marrë një rol gjithnjë e më të rëndësishëm në përcaktimin e shumë prej sëmundjeve.
Agjencia Kombëtare e Mjedisit ka publikuar sot një raport mbi gjendjen e mjedisit, ku është trajtuar edhe ndikimi që ka pasur ndotja e mjedisit dhe ajo e ujit në shëndetin e njerëzve dhe ekosistem.
“Zhvillimi i industrisë dhe përdorimi i makinave bën që ajri që ne thithim të jetë mjaft i ndotur, sidomos në zonat urbane, ku është e përqendruar edhe popullsia më e madhe. Ajri që ne thithim është i mbushur me elementë të rrezikshëm për jetën si CO2, Pb etj. Kjo ka bërë që të shfaqen një numër i madh sëmundjesh me rrezik të lartë për jetën si p.sh. llojet të ndryshme të kancerit”, citohet në raportin e publikuar nga Agjencia Kombëtare e Mjedisit.
Barra për shkak të ndotjes së ajrit në banesë është ulur ndjeshëm gjatë dy dekadave të fundit në Shqipëri. Megjithatë, në vitin 2010, ky faktor rreziku ishte përgjegjës për 6.4% të barrës totale të sëmundjeve në Shqipëri. Në mënyrë të ngjashme, barra e sëmundjeve për shkak të ndotjes mjedisore nga grimcat (PM) ka pasur ulje në Shqipëri (në vitin 2010, ishte përgjegjës për 3.4% të barrës totale të sëmundjeve).
Përveç ndotjes në ambientet e jashtme, një faktor rreziku për shëndetin e njerëzve është edhe ndotja e ajrit brenda në shtëpisë. Në vitin 2010, ndotja e ajrit në banesë nga lëndët djegëse të ngurta ka qenë faktori kryesor i rrezikut për fëmijët nën 5 vjeç.
Barra e sëmundjeve që i atribuohet ndotjes së mjedisit në Shqipëri në vitet 1990 dhe 2010 (burimi: GBD, 2010)
Sa i përket pasojave të ndotjes nga uji, sipas OBSH-së (të cituar në raport), nga uji i ndotur, sot në botë sëmuren mbi pesëqind milionë njerëz.
Nga uji i papastër pasojnë një sërë sëmundjesh, ku, ndër më të rëndësishmet janë kolera, tifoja e zorrëve, hepatiti,etj. Këto sëmundje shpesh kanë marrë viktima njerëzore./ Shendeti.com.al
