Një nga mitet më të përsëritura në botën e “marketingut” është se seksi shet. Por, Gjenerata Z është e mërzitur që ka kaq shumë seks kudo.
Një studim i realizuar nga Universiteti i Kalifornisë zbuloi se teknika për ta mbajtur gjeneratën Z (të rinjtë midis 13 dhe 24 vjeç) të lidhur me një seri televizive apo një film, mund të fillojë të humbasë vlerën: adoleshentët dhe të rinjtë po lodhen duke parë kaq shumë seks kudo.
Ky është përfundimi në të cilin ka arritur studimi i publikuar në fund të vitit 2023, nga Departamenti i Psikologjisë në Universitetin e Kalifornisë.
Studimi tregon se gjenerata Z ka një marrëdhënie të komplikuar me seksin – që përfshin interes më të ulët për takimet e rastësishme, apo debate të vazhdueshme për gjithçka që ka të bëjë me seksin.
Një pjesë e konsiderueshme e të anketuarve (47.5%) besojnë se seksi dhe romanca janë të përfaqësuara tepër në mediat audiovizive dhe se shumica (51.5%) do të preferonin të shihnin më shumë përshkrime të “miqësisë dhe marrëdhënieve platonike”.
Përveç përmbajtjes seksuale, të rinjtë demonstruan gjithashtu një refuzim të konsiderueshëm të marrëdhënieve romantike në përgjithësi. 44.3% thanë se romanca është “tepërpërdorur” nga media dhe 39% do të donin të shihnin më shumë personazhe aromantikë ose aseksualë në ekranin e tyre./Gazeta Shëndeti
