Blertina Koka, “Shëndet+”
Presidenti i Shteteve të Bashkuara të Amerikës, Barack Obama, mbajti fjalimin e tij të fundit drejtuar kombit. Gjatë këtij fjalimi Obama deklaroi se “Amerika mund të kurojë kancerin”.
Ai përmendi rritjen e burimeve për Institutin Kombëtar të Shëndetit, falë edhe ndihmës së zv.presidentit Joe Biden, i cili humbi djalin nga tumori vitin e kaluar.
“Për të gjithë njerëzit e dashur që kemi humbur, për familjen që ne ende mund ta shpëtojmë, le ta bëjmë Amerikën vendin që do të shërojë kancerin një herë e përgjithmonë”.
Edhe zv.presidenti Biden bëri një deklaratë prekëse në lidhje me kurimin e kancerit. “Nuk është personale vetëm për mua, por për gati çdo amerikan dhe miliona njerëz në të gjithë botën.
“Të gjithë ne njohim një person që ka pasur kancer ose po lufton me të. Ata janë familjarët tanë, miqtë dhe kolegët,” tha Biden.
Zv.presidenti propozoi marrjen e dy masave: 1) Të rriten burimet, si private ashtu edhe publike, për të luftuar kancerin. 2) Të rrëzojmë barrierat dhe të bashkojmë të gjithë studiuesit e kancerit bashkë, që të bashkëpunojnë, të ndajnë informacione dhe ta bëjnë kancerin pjesë të së shkuarës.
