Të paktën 41 milionë fëmijë të moshës nën 5 vjeç në të gjithë botën janë obezë ose mbipeshë, paralajmëroi dje Organizata Botërore e Shëndetësisë. Numri fëmijëve obezë ose mbipeshë është rritur më shumë në vendet në zhvillim, ku të ardhurat janë më të ulëta.
Sipas një studimi të kryer nga Komisioni i Organizatës Botërore të Shëndetësisë për Reduktimin e Obezitetit te Fëmijët, “numri i fëmijëve obezë në vendet në zhvillim është dyfishuar nga 7.5 milionë që ka qenë në vitin 1990, në 15.5 milionë në vitin 2014”.
“Mbipesha dhe obeziteti ndikojnë në jetën e fëmijëve, pasi përballen me një sërë pengesash, si fizike, psikologjike dhe probleme shëndetësore,” deklaroi Sania Nishtar, përgjegjëse e Komisionit për Reduktimin e Obezitetit te Fëmijët.
Konsumimi i ushqimeve dhe pijeve të pashëndetshme ka çuar në rritjen e numrit të fëmijëve obezë. Fëmijët që nuk hanë mjaftueshëm ushqime me vlera ushqyese në vitet e para të lindjes, janë më shumë të rrezikuar për t’u bërë obezë kur ndryshojnë mënyrën e të ngrënit. Fëmijët e refugjatëve gjithashtu janë më të rrezikuar për t’u bërë obezë, për shkak të ndryshimeve të menjëhershme kulturore dhe kujdesit të pakët shëndetësorë.
Gati gjysma e fëmijëve obezë ose mbipeshë nën moshën pesë vjeç jetojnë në Azi dhe 25% në Afrikë.
Përshtati për gazetën “Shëndet+”: Blertina Koka/ Burimi: Reuters
