Jemi futur në sezonin kur virozat e stinës janë në kulmin e tyre. Kjo ka bërë që në dyert e urgjencës së Pediatrisë të trokasin çdo ditë me dhjetëra prindër të shqetësuar për gjendjen e fëmijëve të tyre. Fluksi i madh dhe pritja në këmbë me të vegjlit e tyre në krahë është një lodhje e madhe për nënat.
Brenda në urgjencë ka shtretër të cilët rrinë bosh (shiko foton) e megjithatë prindërit vazhdojnë të mbajnë fëmijët në krahë ndërsa presin, teksa nuk lejohen nga stafi që t’i shtrijnë aty fëmijët dhe më pas doktori të vijë t’i vizitojë. Kjo ndoshta do të ishte një zgjidhje e mirë për të lehtësuar situatën edhe për nënat, por edhe për vetë fëmijët, që duke u nisur edhe nga mosha dhe nga sëmundja, nuk kanë rehati ndërsa presin me orë.
E pyetur nga “Shëndet+”, një nga infermeret e stafit thotë se shtretërit janë për fëmijët që kanë nevojë për serume apo për shtrim, dhe jo për ata që vijnë për urgjenca e konsultë. Sado absurde mund të duket një shpjegim i tillë, prindërit vazhdojnë të qëndrojnë në radhë me fëmijët në krahë, teksa jo pak prej këtyre të fundit temperatura u ka shkuar mbi 40.
