Përshëndetje! Ka më shumë se një muaj që djali im 15-vjeçar nuk arrin të flejë gjatë natës dhe fle vetëm në mëngjes rreth orës 5:30 /6:00.
Si pasojë në orën 7:00, kur shkoj ta zgjoj për të shkuar në shkollë, i flihet shumë dhe nuk arrin të zgjohet… dhe qëndron në shtëpi.
Kam folur me mësuesen dhe me mjekun por nuk kam arritur ta zgjidh problemin dhe situata me djalin më duket sikur po përkeqësohet. Ç’duhet të bëj? Kujt duhet t’i drejtohem për të kuptuar se çfarë po i ndodh tim biri?
E nderuar lexuese, fatkeqësisht ky është një fenomen që ndodh shpesh te adoleshentët. Djemtë e rinj shpesh janë si “bufët e natës” dhe në mënyrë të natyrshme priren të shkojnë të flenë vonë dhe si pasojë në mëngjes do të zgjodhen shumë vonë. Disa të rinj shkojnë në ekstrem të kësaj sjelljeje dhe rasti i djalit tuaj duket i tillë, duke bërë që ai të mos u përgjigjet dot angazhimeve të përditshme, siç është në këtë rast shkolla. Si rrjedhojë është shumë e rëndësishme që gradualisht t’ia ndryshoni orarin e rënies në gjumë, duke e detyruar që të zgjohet herët në mëngjes edhe nëse ai ka fjetur vetëm 2-3 orë. Gjithashtu oraret e fjetjes dhe zgjimit duhet t’ia mbani të tilla edhe në fundjavë.
Sigurisht, për djalin tuaj do të jetë e vështirë t’i bindet rregullave, edhe për ju do të jetë e vështirë ta detyroni t’i zbatojë. Megjithatë kjo është zgjidhja e vetme e efektshme për të.
