Qeveria britanike do të shpenzojë 500 milionë paundë në vit gjatë pesë viteve të ardhshme për të bërë kërkime shkencore se si mund të parandalojnë dhe shërojnë sëmundjen e malaries. 
Nismës së kësaj qeverie i është bashkuar edhe themeluesi i Microsoft-it, Bill Gates, i cili do të investojë rreth 200 milionë dollarë çdo vit. Lajmi u bë i ditur nga ministri i financës në Britani, George Osborne, i cili do të merret me menaxhimin e investimeve.
“Në të gjithë botën mbi 1 miliard njerëz janë infektuar me malaria si pasojë e shkaqeve misterioze dhe rënies ekonomike,” tha Osborne gjatë një deklarate për shtyp. “Prandaj , jam i bindur se duke bashkëpunuar edhe me Bill Gates, Britania do të drejtojë botën në luftën kundër kësaj sëmundje,” u shpreh ai.
Në muajin dhjetor, raporti vjetor i Organizatës Botërore të Shëndetësisë tregoi se vdekjet kanë rënë ndjeshëm, nga 839,000 në vitin 2000, në 438,000 në vitin 2015. Deri në vitin 2030, Kombet e Bashkuara duan që rastet e reja të prekjes nga malaria dhe vdekjet të bien me 90%.
Gjatë vitit të parë, fondacioni “Bill & Melinda Gates” do të mbështesë kërkimet shkencore që do të bëhen për eliminimin e sëmundjes së malaries.
Përshtati për gazetën “Shëndet+”: Blertina Koka/ Burimi: Reuters
