Përshtati në shqip: Blertina Koka
Ka shumë arsye përse brokoli nuk duhet të mungojë në dietën tuaj ushqimore. Kjo perime është një burim i mirë i fibrave dhe vitaminës C, një lëndë ushqyese shumë e rëndësishme për forcimin e imunitetit. Enzimat përbërëse të brokolit ndihmojnë dhe në ngadalësimin e procesit të plakjes. Më poshtë gjeni një recetë kreative, e shëndetshme që duhet ta provoni patjetër.
Brokoli, hudhra të pjekura dhe supë pule
Kjo gjellë e shijshme është një alternativë e supës së kungullit. Doni që herës tjetër ta gatuani më shpejt? Mjafton vetëm të piqni dy thelpinj hudhër dhe i ruani në frigorifer për t’i përdorur kur të doni.
Përbërësit
- 1 kokërr hudhër
- ¼ filxhanë vaj avokado
- 1 qepë e vogël, e copëtuar
- 1 ½ brokoli të freskët, e copëtuar bashkë me rrënjët (gati 6 kupa)
- 1 patate mesatare, e qëruar dhe e prerë në dy pjesë
- 1 lugë çaji kripë
- 5-6 kupa supë pule (1 kupë = 240 ml)
- 1 lugë gjelle uthull molle
- ½ lugë çaji piper i zi, plus më shumë për zbukurim (sipas dëshirës)
- ½ lugë çaji mjaltë (sipas dëshirës)
- 6 lugë gjelle kos dhe majdanoz të freskët, për zbukurim (sipas dëshirës)
Përgatitja:
Hapi i parë
Ngroheni sobën në 200 gradë celsius. Qëroni hudhrat dhe i hapni në një letër alumini. I spërkatni me 1 lugë gjelle vaj. Mbështilleni letrën e aluminit dhe e vendosni në një tepsi për pjekje. I piqni deri sa të marrin një ngjyrë të artë dhe të zbuten. Më pas e hiqni letrën e aluminit dhe lërini të ftohen pak.
Hapi i dytë
Ngrohni 2 lugë gjelle vaj në një tigan të madh me nxehtësi mesatare. Shtoni qepën dhe lëreni të skuqet deri sa të marrë një ngjyrë të artë, rreth 5 minuta. Shtoni brokolin, pataten dhe lugën e vajit të mbetur; spërkateni me ¼ lugë çaji kripë. I përzieni mirë përbërësit dhe lërini të skuqen për rreth 3 minuta. Shtoni 5 filxhanë supë pule. Rriteni nxehtësinë në maksimum dhe lërini të ziejnë. Më pas e ulni nxehtësinë dhe lëreni të ziejë derisa brokoli dhe patatet të zbuten mirë, rreth 25 minuta. Shtoni thelpinjtë e hudhrës dhe lëreni të ziejnë bashkë me lëngun për 5 minuta.
Hapi i tretë
Kalojeni përzierjen në shtrydhëse. Nëse supa është shumë e trashë, shtoni një tjetër kupë me lëng pule. Përzieni me uthull molle, piper dhe ¾ e lugës së kripës së mbetur, dhe mjaltin nëse dëshironi. Sipër saj mund të hidhni edhe pak kos, piper dhe majdanoz, nëse dëshironi.
Burimi: Health / Shendeti.com.al
