Nga nefrologia Arjana Strakosha
Presioni i lartë i gjakut mund të dëmtojë enët e gjakut në veshka duke ndikuar në këtë mënyrë në uljen e funksionit të saj. Kështu, veshkat do të eliminojnë më pak produktet toksike dhe mbingarkesën në lëngje nga organizmi. Kjo mbingarkesë në lëngje mund të rrisë akoma më shumë 
presionin arterial duke krijuar në këtë mënyrë një rreth vicioz të rrezikshëm. Megjithatë, presioni i lartë i gjakut mund të jetë edhe pasojë e sëmundjeve të veshkave. Veshkat e sëmura janë më pak të afta të ruajnë presionin e gjakut në vlera normale dhe si rrjedhojë presioni i gjakut do të rritet. Përafërsisht, nëntë nga dhjetë të sëmurë me SRK kanë vlera të larta të presionit arterial.
Trajtimi i hipertensionit është i domosdoshëm për të parandaluar apo ngadalësuar progresionin e SRK, pavarësisht se cili ka qenë shkaku i sëmundjes. Përveç mjekimit me medikamente që ulin presionin e gjakut, duhet domosdoshmërisht të ndryshohet dhe mënyra e jetesës. Duhet të respektohet dieta e rekomanduar nga mjeku dhe të pakësohet sasia e kripës në ushqim. Shumica e pacientëve kanë nevojë për dy apo më shumë medikamente për të arritur vlerat e rekomanduara të presionit arterial.
Pacientët që janë në mbipeshë, duhet të ulin peshën e tyre me 7-10% gjatë vitit të parë të trajtimit të hipertensionit. Kjo rënie në peshë mund të ulë dhe problemet e tjera të shëndetit që lidhen me hipertensionin.
Mënyra më e mirë për të parandaluar sëmundjen e veshkave nga hipertensioni është një kombinim i medikamenteve me ndryshimin e stilit të jetesës, si psh: aktiviteti fizik, ruajtja e peshës trupore, mospirja e duhanit, respektim i dietës së rekomanduar nga mjeku specialist.
