*Rozana Aleksi, gastrohepatologe
Sindorimi i zorrës së irrituar (SZI) është një çrregullim i zakonshëm që prek zorrën e trashë (kolon). SZI është një gjendje kronike që zakonisht shkakton dhimbje barku shtrënguese, spazma, fryrje, diarre dhe kapsllëk. Shqetësimet variojnë nga të lehta, dhe kontrollohen vetëm me ndryshimet në dietë dhe stilin e jetës, deri të rënda dhe kanë nevojë për mjekim përveç këtyre ndryshimeve (lexo më shumë këtu).
Faktorët e rrezikut
Shumë njerëz kanë simptoma rastësore si ato të SZI, por është shumë e mundur që ju të keni SZI nëse:
Jeni i ri – SZI tenton të prekë moshat nën 45 vjeç
Jeni femër – Dy herë më shumë femra preken nga SZI.
Keni histori familjare të SZI – (mund të jetë e lidhur me gjenet, apo ambientin e njëjtë ku jetoni, ose të dyja).
Keni probleme të shëndetit mendor – Ankthi, depresioni, çrregullimet e personalitetit, histori abuzimi shtëpiak janë faktorë rreziku.
Komplikacionet
Diarreja dhe kapsllëku, të dyja shenja të SZI-së, mund të përkeqësojnë hemorroidet. Gjithashtu, evitimi i ushqimeve të caktuara mund të çojë në mungesa lëndësh ushqyese. Impakti që kjo gjendje ka në cilësinë e jetës suaj është komplikacioni më kryesor.
Teste dhe diagnoza
Diagnoza e SZI varet shumë nga historia e plotë mjekësore dhe ekzaminimi fizik. Për shkak se nuk ka shenja fizike që të diagnostikojnë SZI, diagnoza është shpesh një proces i përjashtimit të sëmundjeve të tjera. Për të ndihmuar këtë proces, janë përcaktuar dy grupe kriteresh diagnostikuese për SZI dhe çrregullimet e tjera funksionale të zorrës – gjendje në të cilat zorra ka pamje normale, por nuk punon (funksionon) normalisht.
Nëse ju plotësoni këto kritere dhe nuk keni shenja të tjera të dyshimta, mjeku mund t’ju japë mjekim pa bërë ekzaminime shtesë. Nëse nuk i përgjigjeni mjekimit, duhen bërë teste shtesë si:
Analiza- test i intolerancës ndaj laktozës, glutenit, analiza gjaku, feçesh.
Kolonoskopi (sidomos nëse jeni mbi 50 vjeç), CT, ragiografi, pasazh intestinal me barium./ https://shendeti.com.al/
