Denisa Canameti / gazeta “Shëndet+”
Nëse Trauma prej dy ditësh është gjendur në krizë për medikamente, spitali i Durrësit ka muaj në këtë situatë.
Mungesa e medikamenteve, apo mosfunksionimi i laboratorëve, janë disa nga problemet që kanë sjellë bllokimin e punës së mjekëve, e për rrjedhojë lënien e pacientëve në listë pritjeje.
Gazeta “Shëndet +” e ka denoncuar problemin edhe para disa javësh (lexo këtu). Por si duket situata vazhdon të mbetet e njëjtë.
“Operacionet ka disa javë që i shtyjmë, ata që janë me planifikim. Jemi të përqendruar të rastet urgjente. Kur u bë publike njëherë në media na sollën furnizim dhe me ato që na sollën zgjidhëm rastet që kishin pritur më gjatë. Tani, ka ditë që nuk ka asgjë dhe mezi mbyllim urgjencat”, shprehen burimet jozyrtare brenda spitalit të Durrësit.
“Problem është edhe laboratori. Shumë analiza nuk kryhen. T’u thuash pacientëve që të shkojnë në privat, duket sikur po e bëjmë për interesa tona. Dhe krijohet konflikt”, tregojnë ata për gazetën “Shëndet+”.
Edhe pse në këtë spital janë kryer disa investime në vlera shumë të mëdha parash, duket se gjendja vazhdon të jetë e rëndë./ https://shendeti.com.al/
