Endrit Mone, fizioterapist në Spitalin Universitar të Traumës
Artroza vertebrale ose, ashtu siç njihet nga të gjithë, spondiliartroza është një patologji e karakterizuar nga një degjenerim i artikulacioneve të kolonës vertebrale. Kjo do të thotë se problemet më të shpeshta i ndjejmë në zonën e qafës (cervikale) ose në zonën e fundshpinës (lumbare).
Kush është më i prirur për t’u prekur nga kjo sëmundje?
Subjektet më të rrezikuara nga spondiliartroza janë personat në moshë të madhe ose personat që bëjnë punë të rënda. Këta persona kanë pozicione të detyruara dhe të gabuara gjatë punës.
Cilat janë simptomat e spondiliartrozës?
Simptomat ose shenjat më të shpeshta që hasim kur jemi të prekur nga ky degjenerim, janë:
-dhimbje qafe
-dhimbje në shpine
-ndjenja e ‘miza-miza’ te duart, këmbët ose krahët
-humbja e ndjeshmërisë
-ngurtësim të artikulacioneve
-Ndonjëherë ndeshemi edhe me zhurma ose kërcitje kur lëvizim qafën ose artikulacionet e tjera.
Cilat janë shkaqet e spondiliartrozës?
Shkaqet më të shpeshta lidhen me sforcot e mëdha gjatë ditës. Pozicion i gabuar dhe i detyruar shpeshherë. Gjithashtu shkak mund të jetë edhe një traumë e pësuar.
