Përshtati në shqip për “Shendeti.com.al“: Blertina Koka
Në momentin e parë që ndihemi keq, zgjidhja e menjëhershme është marrja e antibiotikëve dhe ilaçeve, edhe pse e dimë që shkaktojnë efekte anësore. Madje, disa prindër iu japin fëmijëve të tyre antibiotikë pa u konsultuar fare me mjekun.
Një studim i fundit i kryer nga Universiteti i Nju Jorkut ka zbuluar se dhënia e antibiotikëve tek fëmijët mund të rrisë rrezikun që ata të vuajnë nga diabeti. Ky studim i lidh këto ilaçe me diabetin e tipit 1, forma që zhvillohet zakonisht në fëmijëri.
Hulumtuesit shkencorë nga Universiteti i Nju Jorkut kryen një eksperiment tek minjtë, për të parë nëse ndikonin antibiotikët në zhvillimin e diabetit.
Minjtë 6-javësh që morën tri trajtime me antibiotikë (gati 2 vjeç e gjysmë po të krahasohen me njeriun) ishin dyfish më të rrezikuar që të prekeshin nga diabeti, krahasuar me minjtë e tjerë që nuk u dhanë antibiotikë.
Meshkujt janë zakonisht më të rrezikuar, raporton revista “Nature Microbiology”.
Minjtë e studiuar ishin edhe gjenetikisht të prirur të prekeshin nga diabeti i tipit 1, e njëjta gjë siç ndodh me një fëmijë që vjen nga një familje e prekur nga diabeti.
Gati 400 mijë britanikë, ku 30 mijë prej tyre janë fëmijë, vuajnë nga diabeti, dhe kjo sëmundje po përhapet dita ditës.
Rritja është më e dukshme sidomos tek fëmijët, ku numri i fëmijëve nën moshën 5 vjeç të prekur me diabetin e tipit 1 është pesëfishuar këto 5 vitet e fundit.
Diabeti i tipit 1 ndodh kur sistemi imunitar shkatërron qelizat beta që prodhojnë insulinën, një hormon i nevojshëm për të mbajtur nën kontroll nivelet e sheqerit në gjak.
Burimi: Daily Mail / https://shendeti.com.al/
