Përshtati në shqip: Blertina Koka
Nuk është lajmi i ri që frutat janë të mirë për shëndetin. Ju mund të konsumoni fruta dhe perime deri në momentin që të jeni aq të vjetër sa të mos mund t’i përtypni më. Por, sa informacione keni në lidhje me përfitimet shëndetësore të secilit frut? A është rrushi po aq i mirë sa luleshtrydhet? Cili nga frutat ka më shumë sheqer, molla apo banania? Të dish vlerat ushqyese të secilit frut ndoshta nuk është edhe aq e domosdoshme, megjithatë mund t’ju ndihmojë të maksimizoni objektivin tuaj për t’u ushqyer shëndetshëm.
Merrni grejpfrutin, për shembull. Ky lloj agrumi super i athtë futet në listën e super-ushqimeve, duke qenë se ndihmon në uljen e kolesterolit. Po pjepri? Mund të mos jetë aq i zakonshëm (asnjë nuk të thërret për të ngrënë pjepër), megjithatë lëngu i tij ofron vitaminën A, që mund të rrisë riprodhimin e qelizave. Le pastaj shkëlqimin e fytyrës!
Frutat tropikale gjithashtu ofrojnë një sërë përfitimesh shëndetësore dhe dobësuese. Ananasi përmban bromelain, një enzimë që ndihmon në tretjen e ushqimeve. Hani këtë ushqim kur keni fryrje të barkut. Një bonus tjetër: Do të ndiheni sikur jeni me pushime në ndonjë ishull.
Dhe, nëse po kërkoni për më shumë vitaminë C, mos u fokusoni vetëm tek portokalli. Ai mund të njihet si burimi kryesor i vitaminës C, por në fakt edhe kivi është po aq pasur me këtë lëndë ushqyese që forcon imunitetin.
Jeni kureshtarë të dini cilët janë këto super fruta? Hidhuni një sy më poshtë.
- Molla
Lëkura e mollës përmban antioksiduesin kurcetinë, që ka veti antihistamine dhe anti-inflamatore.
- Banania
Mund ta dini që bananet janë të pasura me kalium. Ato janë gjithashtu një burim i mirë i niseshtes rezistente, një karbohidrat i shëndetshëm që ndihmon në përshpejtimin e metabolizmit.
- Grejpfruti
Një grejpfrut në ditë mund të ndihmojë në uljen e niveleve të kolesterolit.
- Boronicat, luleshtrydhet, manaferrat
Këto fruta janë të pasur në antioksidues që mund të luftojnë sëmundjet.
- Pjepri
Është një burim i pasur i vitaminës C dhe A.
- Qershi
Qershitë e marrin ngjyrën e kuqe nga anthocianina, një antioksidues që mund të lehtësojë inflamacionin.
- Rrushi
Rrushi përmban antioksiduesin resveratrol, që lidhet me shëndetin e zemrës.
- Kivi
Është i mirë për sistemin tretës. Kivi përmban po aq vitaminë C sa portokalli.
- Shalqini
Është një burim i mirë i antioksiduesit likopene dhe është 91.5% ujë.
- Ananasi
Ky frut tropikal përmban bromelain, një enzimë që ndihmon në tretjen e ushqimit. Me pak fjalë: ndihmon në rastet kur keni fryrje të barkut.
Burimi: Health / Shendeti.com.al
