Ergys Ramosaço , infeksionist
Ushqimet me mundësi më të madhe kontaminimi, me pasojë shfaqjen e infeksioneve të traktit tretës janë ato që ne i konsumojmë të papërpunuara termikisht, ato me bazë shtazore, qumështi dhe nënproduktet e tij, veza; gjithmonë nëse nuk është treguar kujdes në ruajtjen dhe gatimin e tyre.
Komplikacionet që mund të shfaqen gjatë infeksioneve të traktit tretës janë të lidhura ngushtësisht me gravitetin e çrregullimeve hidro- elektrolitike, si pasojë e humbjes së lëngjeve dhe kripërave minerale, përmes të vjellave dhe diarresë. Në raste të patrajtuara apo të pamjekuara mund të shfaqet dehidratimi, hipotensioni arterial apo pamjaftueshmëria e funksionit të veshkave. Ulja e sasisë së urinimit është pararendëse e të gjitha komplikacioneve të mësipërme. Konsumimi i lëngjeve dhe normalizimi i sasisë së urinimit janë treguesit e mosshfaqjes së komplikacioneve apo e efikasitetit të trajtimit të komplikacioneve të gastroenteriteve.
