Gjykata e Tiranës ka lënë të lirë dy mjekët e maternitetit “Koço Gliozheni”, Helidon Klosi dhe Dritan Deçka. Për ta është dhënë masa “detyrim paraqitje”.
Një ditë më parë, Prokuroria e Tiranës kërkoi 45 ditë burg për dy mjekët (lexo këtu), të cilët u ndaluan për vdekjen e gruas shtatzënë së bashku me foshnjën e saj 9-muajshe.
Ata akuzohen për mjekim të pakujdesshëm në rastin e 35-vjecares Aida Çajka, që humbi jetën në muajin e 9-të të shtatzënisë.
Në dosjen e prokurorëve thuhet se mjekët kanë gabuar në mjekimin e nënës që ishte paraqitur në gjendje të rëndë në maternitet.
Në deklarimet e para dhënë para hetuesve, mësohet se 2 mjekët kanë thënë se ata kanë kryer detyrën dhe kanë zbatuar procedurat që ndiqen në të tilla raste. Gjithashtu ata janë shprehur se nuk është përgjegjësia e tyre rasti i 35-vjeçares Aida Çajku, pasi nuk kanë konstatuar probleme të barrëlindjes dhe kanë gjykuar si të arsyeshme dërgimin e saj në QSUT, ku ka aparatura dhe mjekë specialistë për problemet abdomenit.
Por, për grupin e hetimit ky është një moment kritik gjatë zhvillimit të ngjarjes, pasi mjekët kanë gabuar duke rënduar gjendjen shëndetësore të pacientes.
Dy obstetër-gjinekologët pritet të rikthehen në maternitet për të vijuar punën e tyre. Prokuroria do të vijojë hetimet edhe në spitalet e tjera ku është paraqitur gruaja natën e 16 shtatorit./ https://shendeti.com.al/
