Katër zakonet kryesore të pashëndetshme, pirja e duhanit, dieta e dobët, mungesa e ushtrimeve dhe konsumi i tepërt i alkoolit i shkurtojnë rreth gjashtë vjet jetë personit mesatar, sipas një studimi të ri shkencor kanadez.
Studiuesit, të udhëhequr nga Profesor Doug Manuel i Universitetit të Otavës, i cili botoi punimin përkatës në revistën mjekësore “PLoS Medicine”, vlerësuan se këto katër zakone të këqija janë përgjegjëse për rreth gjysmën e vdekjeve të parakohshme.
“Sjelljet e pashëndetshme e ngarkojnë ndjeshëm jetëgjatësinë dhe këto të katërta përbëjnë kërcënimin më të madh”, tha Manuel, i cili krijoi një algoritëm të ri të veçantë për të bërë llogaritjet përkatëse.
Në detaje, vlerësohet se një e katërta (26%) e të gjitha vdekjeve të parakohshme janë për shkak të pirjes së duhanit, një e katërta tjetër (24%) nga mosaktiviteti fizik, 12% nga dieta e pashëndetshme dhe 0.4% nga konsumi i tepërt i alkoolit.
Për burrat, pirja e duhanit është faktori më i madh i rrezikut, duke hequr mesatarisht 3.1 vjet jetë, ndërsa për gratë, mungesa e aktivitetit fizik “shkurton” rreth tre vjet.
Ata që jetojnë jetën më të shëndetshme, pasi kanë hequr dorë nga të katër zakonet e pashëndetshme, kanë një jetëgjatësi prej pothuajse 18 vjetësh më të gjatë, krahasuar me ata që i ndjekin të katër sjelljet e pashëndetshme në një masë të madhe.
