Procesi i specializimeve në mjekësi ka qenë tërësisht transparent dhe me të gjitha rregullat. Kështu u shpreh ministrja e 
Arsimit, Lindita Nikolla në Komisionin Parlamentar të Shëndetësisë. Ndërsa nga kryetarja Albana Vokshi u theksua se “na ka mbërritur një peticion i firmosur nga 50 specializantë me çështje shqetësuese të ngritura nga ata vetë lidhur me procesin e specializimeve”, Nikolla tha se procesi ishte transparent, largoi nepotizmin dhe korrupsionin dhe në Qendrën Kombëtare të Provimeve deri tani ka pasur vetëm 46 ankimime, që përbëjnë 5% të totalit.
“Pretendimi se në proces janë përfshirë kandidatë pa specializimin përkatës është i pavërrtetë. Janë pranuar të gjitha dokumentet. Nëse ju si komision vërtetoni të kundërtën, unë largohem e turpëruar nga detyra ime si ministre”, deklaroi ministrja Nikolla. Procesi pritet të vijojë me një fazë të dytë në shtator për të realizuar kuotat.
