Ministri i Shëndetësisë Ilir Beqaj ka kërcënuar bluzat e bardha se, nëse vazhdojnë grevën do të ketë penalitete. Përballë një paneli mjekësh, ministri Beqaj theksoi se do të zbatojnë ligjin.
“Kush do që mendon të protestojë e ka të drejtën, por dua t’i kujtoj kujtdo që greva nuk bëhet në shërbimet e dosmosdoshme spitalore. Së dyti, greva bëhet në Shqipëri me organizim sindikal deri më sot nuk kam parë apo dëgjuar që një organizim sindikal ka paraqitur kërkesat. Bëni grevë, por jo në orar pune, aq më tepër që mjekët bllokojnë hyrjen e urgjencës. Do të marrin penalitete, pasi do të zbatojmë ligjin”, theksoi Beqaj.
Por ministri është kundërshtuar menjëherë nga prof. Tritan Kalo, i cili theksoi se mjekët nuk po bëjnë grevë, por po protestojnë ndaj veprimeve arbitrare që po bëhet në kurriz të tyre. “Ne po protestojmë, nuk po bëjmë grevë dhe kjo është lejuar në çdo ambient pune. Së dyti, askush nuk ka dalë në këto protesta për probleme të shëndetësisë pa siguruar shërbimin bazë”, theksoi Kalo.
