Situata në Marinzë vazhdon që të jetë shqetësuese. Disa ditë më parë mediat raportuan gjendjen e rëndë shëndetësore të njerëzve. Për të parë më nga afër këtë gjendje, ministri i Shëndetësisë vizitoi këta banorë të cilët nuk e kursyen revoltën. Sigurisht që ministri premtoi që situata do të përmirësohej duke premtuar se puna nga ana e ekipit mjekësor do të nisë në mënyrë të menjëhershme.
Por edhe këtë herë premtimet e ministrit kanë lënë vend për interpretim, për pakënaqësi. Mjeku Petrit Vargu nuk e kalon pa e komentuar këtë situatë. Ai shkruan në rrjete sociale se cilat janë masat që do të merrte çdo ministër tjetër, veç Beqajt:
“Masat e premtuara nga ministri Beqaj që do të zbatohen në Marinzë:
1) Vënia në dispozicion e dy njësive të lëvizshme të ndihmës mjekësore, në përbërje të të cilave do të jetë një mjek, një infermier dhe një punonjës social, që do të vizitojnë banorët e kësaj zone në shtëpitë e tyre.
2) Në Marinzë do të vendoset dhe një autoambulancë deri në normalizimin e situatës.
Masat që do të merrte çdo ministër tjetër shëndetësie, përveç Beqes:
1) Vlerësim i kompletuar , fizik , kimik ,toksikologjik dhe psikosocial i situatës.
2) Vlerësim në dinamikë i sulfitit të hidrogjenit(H2S).
3) Verifikimi nëse ekzistojnë gaze të tjera asfiksante, si: etan, propan etj.
Çuditërisht, këtë radhë u harrua që të organizohet komisioni i famshëm ritual “Ad Hock”, përmbyll mjeku Petrit Vargu.
