Inspektorati Shtetëror Shëndetësor i Tiranës ka nisur një inspektim në të gjitha qendrat shëndetësore dhe klinikat stomatologjike në mënyrë që të 
shmangen abuzimet me evadimin e mbetjeve spitalore. Nuk janë të pakta rastet kur është folur për rrezikshmërinë e hedhjes së këtyre mbetjeve në të njëtin vend me mbetjet urbane.
Deri tani mësohet të jenë inspektuar afro 295-300 klinika stomatologjike, nga të cilat 151 prej tyre nuk kishin fare kontratë për evadimin e mbetjeve spitalore. Ndërkohë, inpektoriati i ka pezulluar licencën kompanisë “EuroTim”, e cila lidhte kontratë me subjektet, u merrte paratë, por nuk e bënte punën. Tjetër kompani e gjobitur për shkak të dokumentacionit jo të rregullt është edhe firma “Meditel”. Sipas kreut të inspektoratit, Gjergji Koja, do të merren masa të menjëhershme, sepse një situatë e tillë është e papranueshme. Ndonëse ka një ligj të qartë në lidhje me mënyrën si dhe ku duhet të bëhet asgjësimi dhe grumbullimi i mbetjeve spitalore, në shumë raste kjo nuk zbatohet, çka tregon rrezikshmëri për qytetarët, për shëndetin e tyre. /D.Canameti
