Përshëndetje. Unë kam lindur me një defekt në veshka. E kam një veshkë në formë patkoi. Gjatë gjithë jetës sime kam pasur probleme, si: anemia, azotemia, kreati e herë pas here jam shtruar në spital. Por kam 6 vjet që vuaj tani nga artriti 
reumatoid akut në gjunjë, por nuk jam në Shqipëri jetoj në Suedi. Këtu më thonë që kam gonartrozë të theksuar si pasojë e veshkave. Pasi bëra një rezonancë, veshka ime punon ana e djathtë 32% dhe ana e djathtë diku 58%. Prandaj desha t’ju pyes, a e shkakton sëmundja e veshkave artritin? Faleminderit!
Përgjigjet dr. Alketa Koroshi, nefrolog pranë Qendrës Spitalore Universitare “Nënë Tereza”.
E nderuar paciente. Ndonëse analizat që ju përmendni nuk kanë shifra të sakta të njësive matëse, duket që juve vuani nga sëmundja kronike e veshkave. Ndonjëherë, si pasojë e veshkave të sëmura, në gjak akumulohet acidi urik i shtuar, dhe mund të ndodhë artriti në kyçe. Kjo kërkon mjekim të mirë të veshkave për të rritur e stabilizuar funksionin e tyre nxjerrës, si dhe mjekim të artritit duke synuar uljen e acidit urik në gjak.
