Përballë ofertës gjermane për punësimin e infermierëve vjen konstatimi i hidhur nga Urdhri i Infermierit që lidhet me formimin e ulët profesional të tyre. Drejtuesi i Urdhrit, Sabri Skënderi, thotë se profesionistët e shëndetit kanë mangësi të 
theksuara në arsimim dhe praktikë: “Përveç testit të gjuhës, që e kanë pikë të parë dhe duhet në nivelin B2, ata kërkojnë edhe eksperiencë profesionale. A janë infermieret tanë që t’i përgjigjen kërkesave të kohës? Unë them se deri tani jo, prandaj duhet t’i futemi punës”.
Urdhëri i infermirëve rendit disa arsye përse profesionistë të shëndetit shfaqen në këtë cilësi profesionale: kushtet e këqija të praktikës, infrastruktura e keqe e laboratorëve, papunësia, pasi kërkesat janë dy herë më pak se kuotat e diplomimit.
Vetëm nga provimi i formimit praktik që zhvillon urdhri, rezultojnë 15-20% infermier mbetës të cilët do t’i nënshtohen për herë të dytë vlerësimit.
“15-20% të këtyre studentëve janë rrëzuar në testimin e praktikës. Të gjithë këta kandidatë ta kenë të qartë se nuk do të jetë e lehtë ky vlerësim i aftësive praktike”, thotë Skënderi.
Testimi profesional për infermierët që sapo kanë mbaruar studimet do të kryhen nga data 12-15 tetor në të cilin do të pyeten mbi 1000 infermirë përpara se të hyjnë në provimin e shtetit./ ON
