Elona Tereziu, gazeta “Shëndet+”
“Ti mund të parandalosh Kancerin e Qafës së Mitrës me testin e duhur në kohën e duhur!” Ky ishte slogani i fushatës ndërgjegjësuese, organizuar dje në sheshin ”Skënderbej” nga Qendra Shqiptare për Popullsinë dhe Zhvillimin (QSHPZH) mbështetur nga Federata Ndërkombëtare e Planifikimit Familjar (IPPF).
Fushata kishte qëllim të informonte dhe të rriste ndërgjegjësonte tek gratë e moshave 30-49 vjeçe për rrugët e parandalimit të kancerit të qafës së mitrës duke kryer testet e duhura: Pap Test, Kontrolli Vizual Pamor me Acid Acetik (VIA) si edhe Testi për Virusin e Papilomës Humane (HPV). Grup tjetër i synuar i kësaj fushatë ishin edhe vajzat e reja të moshave 9-13 vjeçe, të cilat u informuan mbi rëndësinë e bërjes së vaksinës kundër HPV-së.
Kësaj fushatë iu bashkuan rreth 40 aktivistë, vullnetarë dhe përfaqësues të institucioneve/organizatave të shëndetit publik dhe të drejtave të grave (Instituti i Shendetit Publik, Autoriteti Shëndetësor Rajonal, YPeer Albania, CRCA, Stop AIDS, Act for Society, YMCA etj.). Të pranishmit në këtë aktivitet shpërndanë materiale të ndryshme informimi, edukimi, komunikimi tek grupet e synuara, por dhe tek publiku në përgjithësi si edhe përcollën mesazhin e rëndësisë së këtyre ekzaminivemeve/kontrolleve për një shëndet të mirë të grave.
Në fjalën e saj Lida Grabova, drejtore ekzekutive e QSHPZH-së theksoi: ”Është shumë e rëndësishme të hartohet një plani kombëtar depistimi/kontrolli pasi një plan i tillë mungon dhe është i domosdoshëm duke marrë në konsideratë shifrat e fundit të raportuar nga Qendra Ndërkombëtare për Informim mbi HPV-në (http://www.hpvcentre.net/) në Shqipëri çdo vit, 93 gra diagnostikohen me kancer të qafës së mitrës, 35 vdesin nga kjo sëmundje”.
Ndërkohë Juna Mali, aktiviste dhe studente e Shëndeti Publik, u bëri thirrje të drejtpërdejtë vajzave dhe grave: ”Kanceri i qafës së mitrës është një kancer që mund të parandalohet, ndaj do t’i ftoja të gjitha gratë të bëjnë kontrolle periodike, kryesisht gratë në moshë riprodhuese (30-49 vjeçe), që t’i paraprijnë kësaj sëmundjeje dhe të mbrojnë jetën e tyre.”
Krahas numrit të madh të vajzave dhe grave, të cilat ishin tepër të interesuara për t’u informuar, ajo çka binte në sy, ishte edhe numri i lartë i djemve dhe burrave të cilët krahas shëndetit të tyre, duket se kanë filluar të ndërgjegjësohen dhe të kuptojnë se barra e shëndetit të grave duhet të jetë një shqetësim për të gjithë: vetë gratë, partnerët e bashkëshortët e tyre, shoqërinë dhe politikëbërjen.
