Është zbardhur dëshmia e pacientit që iu vu flaka në pavionin e dializës, brenda Spitalit Amerikan, Dashamir Saraçi. I pyetur nga prokurorët, pacienti i djegur ka treguar arsyen që ai mendon se mund ta ketë shtyrë pacientin tjetër t’i vinte flakën:
“Ndoshta më ka sulmuar me benzinë për shkak të radhës, për ato rastet kur e kam marrë shërbimin përpara tij”, ka treguar Saraçi për grupin hetimor.
Saraçi ka deklaruar para hetuesve se nuk ka pasur më parë ndonjë përplasje apo konflikt të rëndë me autorin e ngjarjes, Lefter Canaj, i cili i vuri flakën pavionit të dializës. Nga kjo ngjarje e rëndë kanë mbetur të vdekur 3 pacientë, mes tyre edhe autori i ngjarjes, z. Canaj.
Burime të gazetës “Shëndet+” bëjnë me dije se z. Canaj e sorollatnin gjithmonë nga një spital në tjetrin për të marrë shërbimin e dializës. Ai kishte shfaqur kohët e fundit shenja depresioni dhe, në një moment kritik emocional apo psikologjik, mund ta ketë përjetuar keq faktin që Dashamir Saraçit i është dhënë shërbimi i hemodializës përpara tij./ https://shendeti.com.al/
