Njeri i qetë. Këto janë fjalët me të cilat përshkruhet nga të gjithë 57-vjeçari Lefter Canaj, autor i zjarrit në ambientet e Spitalit Amerikan mëngjesin e 25 korrikut. Gjendja e rëndë psikologjike mendohet të ketë qenë shkaku që e ka shtyrë Canajn të ndërmarrë një veprim kaq të rëndë që do t’i kushtonte jetën atij vetë, por do të shkaktonte edhe vdekjen e dy pacienteve të tjera.
Arsyet e kësaj gjendje psikologjike janë sqaruar pak ose aspak duke qëndruar në nivel aludimesh. Psikologët e institucionit (nëse ka patur të tillë), siç duket nuk e kanë vlerësuar sa dhe si duhet gjendjen e rënduar emocionale të pacientit të ndjerë, pasi, siç u konfirmua edhe nga instancat përgjegjëse, dy pacientët e konfliktuar janë përfshirë vazhdimisht në sherre.
Lefter Canaj njihej si njeri i qetë dhe shumë i urtë. I divorcuar, pa fëmijë, ai jetonte vetëm në një nga lagjet e Tiranës. Për shumë vite kishte punuar si bojaxhi në shtetin grek. Kishte rreth 4 vite në dializë.
Të afërm të tij shprehen të tronditur pasi, sipas tyre, Canaj nuk ka shfaqur kurrë shenja agresiviteti ndaj askujt.
“S’na e merrte mendja të arrinte deri këtu. Ka një familje të ndershme, vëllezër punëtorë që e fitojnë bukën me djersën e ballit. Te spitali e hidhnin si top futbolli sa në një anë në anën tjetër. Fillimisht ka qenë i shtruar te nefrologjia. Pastaj kaloi te spitali privat. Nuk ka pasur probleme të tilla ndonjëherë”, shprehen të afërmit. Gjithashtu, familjarët e të ndjerit janë të trembur nga ndonjë hakmarrje e mundshme.
Më 25 korrik, mëngjesin e së hënës, Lefter Canaj, pacient i dializës në Spitalin Amerikan 1 në Tiranë, i vuri zjarrin me një shishe benzinë pacient D. Saraçi pas një konflikti të vazhdueshëm. Si pasojë reparti i dializës u përfshi nga flakët, ndërkohë që ndërruan jetë dy pacientet Sanie Sulaj dhe Hanife Mali, 55-vjeçare. Vetë autori Lefter Canaj ndërroi jetë mëngjesin e së martës. D.C./shendeti.com.al
