Për herë të parë, shërbimi i hemodializës, jetik për këdo që e kanë të nevojshme atë, do të kryhet edhe në Lezhë. Pas Vlorës dhe Shkodrës, shërbimi i hemodializës tani do të shtrihet edhe në Lezhë. Ky shërbim do t’u japë fund vuajtjeve fizike dhe shpirtërore të 42 të sëmurëve me insuficience renale, të cilët ishin të detyruar të udhëtonin 3 herë në javë me familjarë të tyre drejt Shkodrës apo Tiranës. Tani ata do ta marrin shërbimin në Spitalin Rajonal të Lezhës.
Në këtë qendër janë instaluar 10 + 2 poste trajtimi (dy poste në salla të veçanta për pacientët me Hepatit C dhe HIV), për të kryer trajtimin e pacientëve vetëm në 2 turne. Në të ardhmen, shtimi i makinave dhe i posteve të hemodializës mund të rritet proporcionalisht në funksion të nevojave të pacientëve. Teknologjia e instaluar tashmë dhe vënë në funksion, si dhe impianti i aspirimit dhe i kondicionimit të përdorur janë të standardeve më bashkëkohore dhe me parametrat me modernë për kryerjen e hemodializës klasike. Qendra është e pajisur me laborator të brendshëm, i cili mundëson kryerjen e testeve laboratorike sipas protokollit të miratuar të hemodializës në mënyrë të menjëhershme. Po kështu, për të siguruar trajtimin e pacientëve pa asnjë ndërprerje qendra është e pajisur me gjenerator dhe UPS.
Qendrën e re të Hemodializës e vizitoi kryeministri Edi Rama, i shoqëruar nga ministri i Shëndetësisë Ilir Beqaj. Ata u takuan me pacientë që ndërkohë ishin duke kryer dializën.
Sipas kontratës koncesionare, veç Vlorës, Shkodrës dhe Lezhës, do të ngrihen dhe 2 qendra të tjera që do të ofrojnë shërbimin e hemodializës: Korçë dhe Elbasan.
