Sa gjëra kemi të përbashkëta me partnerin? Më shumë sesa mund të mendohet, pasi rezulton se jemi të prirur të martohemi me persona me të cilët kemi ADN të ngjashme. Kjo gjë bëhet e ditur nga kërkuesit e Universitetit të Koloradës, në një studim të botuar në “Procedings of the National Academy of Sciences”. Shkencëtarët konfirmuan se “mekanizmi përmes të cilit zgjidhet partneri është i ndërlikuar. Ndoshta ADN-ja hyn në listën e gjatë të preferencave, bashkë me nivelin kulturor, besimin, moshën, karakterin etj”.
Ata përmbyllën se “është shumë e vështirë të vendosësh se sa gjenet tona komandojnë vendime të tilla por ajo që është zbuluar është se të martuarit janë gjenetikisht më të ngjashëm krahasuar me individë të tjerë, të përzgjedhur rastësisht. Ndoshta kjo fuqi është më e ulët krahasuar me faktorë të tjerë shoqërore, por gjithsesi është pjesë e serisë së elementeve përzgjedhëse”.
