Ashtu si çdo sëmundje tjetër, edhe ato të gjakut kanë një tendencë rritjeje në vendit tonë. Në një intervistë për gazetën “Shëndet+”, hematologu Arben Ivanaj shprehet se janë rreth 1 mijë raste të reja çdo vit të diagnostikuar me këto sëmundje. Sipas tij 80% e këtyre sëmundjeve janë malinje ku bën pjesë edhe leucemia. Nga këto sëmundje preken të gjitha moshat dhe një nga shkaqet që nxit përhapjen e këtyre sëmundjeve është pikërisht smogu.
Doktor, a kemi një rritje të sëmundjeve të gjakut në vend?
Rreth 80% e sëmundjeve të gjakut janë ato sëmundje që quhen malinje, pra, kanceri, në të cilat bëjnë pjesë linfomat, milomat dhe leucemitë akute dhe kronike në të dyja llojet e saj.
Linfomat janë një grup i madh sëmundjesh malinje. Në fakt, të gjitha sëmundjet që përmenda kanë një frenkuecë standarte në Shqipëri, pra nuk kemi as raste më pak dhe as më shumë nga pjesa tjetër e kontinentit europian. Megjithatë statistikat tona nuk janë të adaptuara ashtu siç duhet për vetë faktin se regjistri i sëmundjeve kronike nuk ekziston. Pavarësisht se po punohet, ky regjistër nuk është në standardin e kërkuar në të cilin mund t’i referohemi për të nxjerrë statistikat e sakta.
