Ka ndërruar jetë mëngjesin e sotëm mjeku kirurg pranë Spitalit Ushtarak, Arben Runa. Mjeku vuante nga një sëmundje e rëndë në mushkëri, duke humbur kështu betejën pas 2 vitesh. Lajmin për vdekjen e tij e ka bërë të ditur gazetari Mero Baze, i cili ishte edhe një nga miqtë më të ngushtë të mjekut Runa. Me anë të një njoftimi në faqen e tij në Facebook, Baze bën të ditur se varrimi bëhet nesër në orën 10 në Tufinë.
Sot në mëngjes Dr. Beni nuk u zgjua më, duke humbur një betejë dyvjeçare me sëmundjen e tij në mushkëri. Mua do më mungoj një nga miqtë më të çmuar në jetë, një mjek i talentuar, një poet dhe rrëfimtar i rrallë dhe një njeri i mençur që diti ta bëjë siç donte jetën e tij. Arben Runa u diplomua për kirurg traumatolog dhe shërbeu deri në fund si kirurg pranë Spitalit Ushtarak. Ai kishte po ashtu plot pasione për letërsinë dhe është autor i disa cikleve të arrira poetike, tregimeve dhe reportazheve botuar në vitet 90.
Ada dhe dy fëmijët e tij shpresoj të gjejnë forcë ta përballojne ndarjen me të. Varrimi bëhet nesër në orën 10 në Tufinë./ Shendeti.com.al
