Të dhënat e 4 viteve tregojnë se 1 në 7 shqiptarë kanë vlera të larta të hipertensionit. Më shumë se 90 mijë qytetarë që janë referuar për vizita të specializuara, pas rezultateve që ka prodhuar kontrolli mjekësor bazë.
Një në 7 qytetarë janë identifikuar me probleme të tensionit arterial, një prej shkaktarëve kryesorë të sëmundjeve kardiovaskulare. Në Ditën Botërore të Hipertensionit, Ministria e Shëndetësisë dhe Instituti i Shëndetit Publik organizuan Forumin Shkencor: “Kontrolli Mjekësor Bazë, në kuadër të mbulimit shëndetësor universal”, ku u prezantuan gjetjet pas 4 vitesh zbatim të programit kombëtar “Si je?” për grupmoshën 35-70 vjeç.
“Sot pas 4 vitesh, të dhënat tregojnë se 1 në 7 persona ka vlera mbi normat të hipertensionit; 1 në 4 qytetarë rezultojnë me kolesterol të lartë, pra kanë rrezik të lartë për t’u prekur nga sëmundjet e zemrës; 1 në 6 raste ka rezultuar me vlera më të larta të glicemisë, që orienton për sëmundje të diabetit; 1 në 30 qytetare ka probleme me konsumin e lartë të alkoolit”, u shpreh Ministrja.
Rezultatet që kanë prodhuar të dhënat nga kontrolli mjekësor bazë tregojnë se kemi një risk të lartë për sëmundjet kardiovaskulare, diabetin, etj.
