Shqipëria vijon të shfaqë shifra të larta të infektimeve ditore nga COVID -19, ndërkohë që situatë problematike po vihet re në të gjitha vendet e Ballkanit Perëndimor.
Sipas statistikave zyrtare të Ministrisë së Shëndetësisë, në të gjithë vendin janë 1213 raste aktive, por ajo që duket shqetësuese lidhet me përqindjen e lartë të infektimve në raport me testimet e kryera, veçanërisht gjatë javës së fundit. Kështu, në 24 orët e fundit janë kryer 409 testime për të dyshuar të prekur me COVID19, nga të cilat janë konfirmuar 74 raste pozitive. Kjo do të thotë se më shumë se 18% e të testurave në këto 24 orë kanë rezultuar pozitivë.
Edhe gjatë ditës së djeshme, përqindja e rasteve pozitive në raport me testimet ka qenë thuajse në të njëjtat shifra, 71 raste në 459 testime.
Pak a shumë të njëjtat vlera janë shënuar edhe në ditët paraardhëse. 392 testime janë kryer në datën 5 Korrik nga ku kanë rezultuar 74 raste pozitive; 376 testime janë kryer më 4 Korrik ku janë konfirmuar 67 raste pozitive; 362 testime janë kryer më 3 korrik dhe kanë rezultuar 90 raste pozitive.
Nga ana tjetër , ajo që vihet re gjatë kësaj jave është rritja dominante e numrit të rasteve në kryeqytet, ndërsa veç Durrësit dhe Shkodrës, listës së qyteteve me shumë raste aktive tashmë i është shtuar edhe Vlora.
Shpërndarja gjeografike e rasteve aktive sipas qarqeve:
Tiranë 477
Durrës 221
Shkodër 167
Vlorë 115
Lezhë 63
Fier 49
Korçë 30
Elbasan 25
Kukës 24
Berat 16
Gjirokastër 15
Dibër 11
OPINION.AL
