Gazetare: Klevisa GJIKA
Shefi i Urgjencës Kombëtare, Skënder Brataj, gjatë një interviste për emisionin “Opinion” ka deklaruar se numri i të infektuarve do të rritet gjatë muajit korrik. Sipas tij, do vazhdojmë të kemi rritje të prekurve nga koronavirusi.
Këtë fakt, Brataj e lidh me lehtësimin e masave dhe daljen e lirë të të gjithë qytetarëve në muajin që lamë pas.
“Në këtë periudhë ne jemi me fillimin e hapjes. Kjo javë është në rritje dhe përkon me hapjen e qershorit. Kapacitetet spitalore janë rreth 550 shtretër dhe kemi 256 respiratorë. Unë mendoj se shpejti do hapim COVID – 2. Korrikun do ta kemi në ngritje, sepse është maksimumi i dëmit që është bërë. Po kërkohet që njerëzit të ndërgjegjësohen”.
Krahas kësaj, Brataj shtoi se kohët e fundit është rritur përqindja e të infektuarve simptomatikë. Më saktësisht, në fillim të pandemisë vetëm 30% e popullsisë shfaqte simptoma, ndërsa tani numri i të prekurve me shenja koronavirusi është dyfishuar dhe shkon në 61%.
