Bisedoi: Klevisa GJIKA
Pasojat e koronavirusit në aspektin shëndetësor kanë qenë të shumta. Në një intervistë për gazetën “Shëndeti Plus”, mjekja endokrinologe Luftime Bruka tregon se stresi i krijuar nga pandemia ka ndikuar shumë negativisht në sëmundjen kronike shumë të përhapur në popullatë.
“Diabeti ka qenë sëmundja me më shumë pasoja nga COVID – 19. Stresi i COVID – 19 ka qenë një ndër shkaqet kryesore të ç’ekuilibrimit të diabetit, sepse ne po e shohim që koronavirusi po sillet ndryshe. Diabetikët ishin në kategorinë e parë. Faktikisht, pacientët kanë ardhur vetëm kur kanë patur shumë probleme. Më shumë jemi marrë me telefonata, deri në 12 të natës. Komunikimi ka qenë efektiv, por nuk është sikur ia thua ballë për ballë”, thekson ajo.
Endokrinologia shton: “Pandemia tek diabetikët ka luajtur një rol shumë negativ, si në aktivitetin fizik për shkak të kushteve nuk kanë lëvizuar dhe kjo ka ndikuar negativisht në trajtim. Pastaj është stresi, kequshqyerja, pasi duke qenë të mbyllur, duke qenë në shtëpi nuk kanë bërë edhe dietën që duhet”.
Sipas mjekes endokrinologe, diabeti ka qenë sëmundja me më shumë pasoja nga COVID – 19.
Vetë periudha e covid– 19 ka qenë një ndër shkaqet që është dezekuilibruar diabeti, kemi pasur më tepër stres për stabilizimin e tyre sepse kanë pasur glicemi të larta”, shprehet Bruka.
Bruka tregon se çekuilibrimi i metabolizmit vazhdon akoma, pavarësisht se njerëzit i janë rikthyer normalitetit. Përsa i përket kurbës së vizitave mjekja thotë se vizitat u rritën kur mbaroi karantina, ndërsa tani është një kurbë e sheshtë.
