Gazetare: Klevisa GJIKA
Ministrja Ogerta Manastirliu deklaron se po forcohen kapacitetet për kryerjen e testeve Real Time PCR. Gjatë inspektimit të sotëm në laboratorin e Qendrës Spitalore Universitare “Nënë Tereza”, ajo u shpreh:
“Pas laboratorit të referencës në Institutin e Shëndetit Publik, testimet molekulare për identifikimin e SARS COV2 do të kryhen edhe në QSUT”.
Manastirliu theksoi se ky proces nënkupton gjurmimin e rasteve dhe izolimni e tyre: “Me hapjen e këtij laboratori të dytë, krijojmë baza të mira për të rritur dhe për të zhvilluar testimin, i cili në fakt do të vijojë të ketë një objektiv kyç: gjurmimin e rasteve dhe izolimin e tyre. Sepse ne për asnjë moment nuk e kemi humbur vëmendjen nga qëllimi primar i testimit. i cili është pikërisht gjurmimi, izolimi dhe mundësia e kufizimit dhe e ndërprerjes së zinxhirit të infeksionit. Ky laborator i çertifikuar, siç e premtuam, do të rrisë kapacitetet e testimit dhe për t’iu përgjigjur strategjisë së testimit të realizuar me ekspertizën e Komitetit Teknik të Ekspertëve”.
