Muaji maj erdhi me heqjen e të gjitha kufizimeve anti-Covid në Republikën e Shqipërisë. Vërtet ka një numër në rënie të të infektuarve në një ditë, por mjekët konstatojnë se ky numër është më i lartë duke pasur parasysh që njerëzit ose mjekohen vetë në shtëpi, ose qëndrojnë në komunikim të vazhdueshëm telefonik me doktorët.
Sonila Brati: Ne e shohim që ka një rënie të rasteve dhe personave, që vijnë e drejtohen tek mjeku i familjes. Pavarësisht se mund të kenë simptomatika nuk vijnë më duke menduar se nuk ka më Covid-19. Megjithatë nuk duhen anashkaluar simptoma të tilla si temperaturë e lartë, bark e të vjella, dhimbje koke pa asnjë simptomë tjetër. Duhet të vijnë tek mjeku, sepse ato mund të jenë shenja të infektimit nga Covid-19 . Duhe të vijnë të bëjnë tamponin, dhe në rast se rezultojnë të infektuar duhet të karantinohen 5 ditë që të mos jenë burim infektimesh për të tjerët.
Nëse bëjmë një krahasim nga janari i këtij viti deri më tani rezulton, se në janar, ne kryenim rreth 60-70 madje edhe më shumë vizita në një ditë, ndërsa tani ky numër shkon në 25-30 vizita në ditë.
Me fëmijët jemi në një situatë tjetër, shumë të ngarkuar. Të paktën që nga fundmarsi dhe prilli po qarkullojnë viroza të shumta. Vërejmë simptoma të tilla temperaturë e lartë, infeksion i rrugëve të sipërme të frymëmarrjes, apo probleme me bajamet e qelbëzuara, infeksione të rrugëve të poshtme, që nga trakeitet e thjeshta, trakobronkitet, më pak bronkopneumonitë dhe kryesisht problem gastrointestinale, bark e të vjella. Është një virozë që qarkullon në një periudhë thuajse 1-mujore. Nuk përjashtohet edhe variçela, ose “lija e dhenve” që është prezente që nga janari, pra prej 5 muajsh në vendin tonë./Top Channel
