Arlinda Gjypi, kryeredaktore e “Shëndet+”
Keni provuar çdo lloj çaji? Ju kanë folur për të mirat e tyre të pafundme? Por ndoshta nuk ju ka pëlqyer shija. Atëherë ç’mund të bëni që të përzgjidhni një çaj që ju pëlqen shumë dhe të fusni në trup lëngje sa më të mira. Ne të gazetës “Shëndet+” ju sugjerojmë dy çajra tepër të përdorshëm në zyrën tonë.
Çaji në zyrën tonë
Këta çajra i kemi vetëcilësuar me emrin “Enardel” (emër i shpikur prej nesh), duke respektuar emrat e të gjithë çajpirësve të redaksisë sonë (Eni, Arlinda, Denisa, Daniela, Elena).
- Blini në treg boronicë të thatë, mollë të egër të thatë dhe kanellë shkop. Fusni në një litër ujë një shkop kanellë, pak mollë të egër, gjysmë luge kokrra boronice dhe ziejeni për 10 minuta. Lëngut të përftuar shtojini një lugë mjaltë. Do të provoni një shije tepër të mirë dhe do të jeni më energjikë në punë.
- Merrni një degë të vogël sherebelë të njomë ose të thatë, pak mollë të egër të thatë dhe futeni në një litër ujë (Sot ne i kemi shtuar dhe disa gjethe trëndafili të njoma). Pasi ta zieni për dhjetë minuta, lëngut të përftuar shtojini një lugë mjaltë. Sherebela është shumë e mirë për qetësimin e nervave dhe në periudha pune stresi do t’ju ndihmojë shumë. Gjithashtu është e mirë edhe për femrat që kanë probleme me dhimbjet e ciklit menstrual. Kini kujdes, pasi shija e sherebelës është shumë e fortë dhe nëse e hidhni në sasi të madhe, çaji mund të bëhet shumë i hidhur. Unë personalisht, këtij çaji i shtoj edhe disa copa molle të njomë. Por kjo është zgjedhja e gjithsecilit.
Këto janë vetëm dy nga çajrat “Enardel” që përdorim në zyrë. Pasi t’i provoni, mund të na jepni komentet tuaja.
Ah, të gjithë përbërësit janë të thjeshtë për t’i gjetur. Kërkoni në supermarkete tek erëzat dhe frutat e thata ose në dyqanet që shesin erëza. Sherebelën e njomë dhe boronicën, ndoshta edhe mollët e egra besojmë se mund t’i gjeni edhe në tregun e fruta-perimeve.
