Për “Shëndet+”, nga mjekja dermatologe Ardiana Sinani
Përdorimi i letrës me bazë dylli është tepër i dhimbshëm, pasi jo rrallë qimja hiqet bashkë me lëkurën duke e traumatizuar këtë të fundit. Dylli është një mënyrë e shpejtë që ka efekt të gjatë dhe e aplikueshme sidomos për pjesë të trupit 
jo shumë delikate, si këmbët dhe mustaqet. Në përgjithësi është me bazë mjalti. Është më mirë që depilimi me dyllë të bëhet në një institut bukurie. Estetistja ka më shumë praktikë, është e shpejtë dhe përdor më pak tërheqje për të përfunduar depilimin dhe sa më pak tërheqje të bëhen, aq më mirë është. Shkulja nuk është e dëmshme, ose të paktën nuk ka studime që e konfirmojnë këtë.
Ka shumë rëndësi që heqja të mos bëhet në mënyrë të vrullshme, që të mos lërë traumë. Si dhe është e rëndësishme që të kryhet në kushte të larta higjienike. Nëse nuk kryhet në kushte higjienike, mundësia për t’u prekur nga infeksionet e lëkurës është e madhe.
Shkulja është një lloj traume. Kemi pasur shumë raste ku vijnë vajzat, sepse mund të kenë pasur probleme me lëkurën, pasi janë depiluar në qendra estetike aspak të favorshme, aspak higjienike.
