Përshtati në shqip: Blertina Koka
Konsumimi i 3 filxhanëve kafe në ditë të zgjat jetën. Në këtë përfundim ka arritur një studim i kryer tek thuajse 1 milion njerëz nga 10 shtete evropiane. Studimi, i publikuar tek revista “Annals of Internal Medicine”, sugjeron se një filxhan më shumë kafe në ditë mund të zgjasë jetën e një njeriu – edhe nëse kafja nuk përmban kafeinë.
Megjithatë, ekspertët skeptikë theksojnë se nuk mund të themi me siguri që kafja është ajo që ka efekt mbrojtës, por mund të jetë mënyra e jetesës së shëndetshme tek konsumuesit e kafes.
Kështu, sipas tyre, nuk ka një arsye bindëse përse duhet të pimë një filxhan më shumë kafe.
Çfarë ka zbuluar studimi më i fundit?
Hulumtuesit shkencorë nga Agjencia Ndërkombëtare për Hulumtimin e Kancerit dhe Kolegji Mbretëror i Londrës thonë se kanë zbuluar që konsumimi i kafes lidhet me një rrezik më të ulët të vdekjes së parakohshme – sidomos nga sëmundjet e zemrës apo të zorrës.
Ata arritën në këtë përfundim pasi analizuan të dhënat e njerëzve të shëndetshëm mbi 35 vjeç nga 10 shtete evropiane.
Në fillim të studimit u pyetën pjesëmarrësit se sa filxhanë kafe pinin në ditë, pastaj pas 16 vitesh shkencëtarët nxorën të dhënat e numrit të personave që kishin vdekur.
Profesor Sir David Spiegelhalter, nga Universiteti i Kembrixhit, thotë se nëse rënia e numrit të vdekjeve i atribuohet realisht kafes, atëherë një filxhan më shumë kafe çdo ditë mund të zgjasë jetën e një burri me gati 3 muaj dhe gruaje me gati 1 muaj mesatarisht.
Burimi: BBC / Shendeti.com.al
