Pirja e kafesë në mëngjes mund të jetë sekreti për një jetë më të gjatë – kështu thotë një kardiolog i njohur.
Sipas Dr. Aurelio Rojas, specialist i zemrës në Spitalin Rajonal Universitar të Malagës, ata që pinë kafe në mëngjes kanë një jetëgjatësi më të madhe dhe një rrezik më të ulët për të pësuar sulm në zemër.
Në një video të publikuar në profilin e tij në Instagram – ku ndiqet nga mbi 400,000 persona – Dr. Rojas ndau gjetjet e një studimi të fundit që hedh dritë mbi përfitimet shëndetësore të kafesë.
Studimi është realizuar nga Qendra për Kërkime mbi Obezitetin në Universitetin Tulane, në New Orleans, dhe ka ndjekur 20,000 persona për mbi 20 vite, duke krahasuar shëndetin e konsumuesve të rregullt të kafesë me ata që nuk e pinin.
Rezultatet treguan se personat që pinin kafe kishin 16% më pak gjasa për të ndërruar jetë gjatë periudhës 10-vjeçare të studimit, dhe 30% më pak rrezik për të vdekur nga sëmundjet e zemrës.
Megjithatë, ky përfitim u vu re vetëm te ata që pinin kafe në mëngjes – konsumimi gjatë gjithë ditës nuk solli të njëjtin efekt pozitiv.
Në videon e tij, Dr. Rojas thekson se kafeina pas orës 12:00 mund të dëmtojë ritmin cirkadian – orën biologjike të trupit – dhe të ndikojë negativisht në sekretimin e hormoneve të pushimit si melatonina dhe kortizoli.
“Pirja e kafesë pasdite prish ekuilibrin natyral të trupit dhe rrit nivelin e stresit,” – thotë ai.
“Prandaj, po – shijojeni kafenë menjëherë në mëngjes.”
Përfitimet kryesore të kësaj pijeje qëndrojnë te kokrrat e kafesë, të cilat janë të pasura me vitamina B2 dhe B5, të nevojshme për shëndetin e qelizave të gjakut dhe kontrollin e kolesterolit.
Ato përmbajnë gjithashtu kalium dhe magnez, minerale kyçe për rregullimin e tensionit të gjakut dhe nivelit të sheqerit. Studimet kanë treguar se mungesa e magnezit lidhet me rritje të rrezikut për infarkte dhe hemorragji cerebrale.
Një tjetër studim, i publikuar nga Revista Amerikane e Ushqyerjes Klinike, tregoi se substancat bimore në kafe mund të ulin rrezikun për diabet të tipit 2 deri në 10%.
“Le ta kujtojmë se kafeja ka treguar ndikim pozitiv për zemrën: ul rrezikun për diabet, ndihmon në humbjen e peshës dhe përmirëson shëndetin kardiovaskular,” – përfundon Dr. Rojas.
Ndërkohë, edhe studime të mëhershme kanë mbështetur këto përfitime – përfshirë një kërkim të përbashkët nga Universiteti Semmelweis në Hungari dhe Queen Mary University of London, i cili tregoi se pirja e kafesë ul ndjeshëm rrezikun për goditje fatale në tru.
Burimi: Daily Mail
