Nga Elona Tereziu
Mungesa e kushteve higjenosanitare në kopshtin nr. 34, pajisjet e kuzhinës të amortizura, myku dhe lagështia në mure, ka bërë që Autoriteti Kombëtar i Ushqimit (AKU) të paralajmërojë mbylljen e tij.
Këto problematika janë ngritur më parë edhe nga shoqata “Together for Life”, në kuadër të projektit ”Lëviz për Kopshtin Tim”, ku gjatë monitorimeve në 43 kopshtet e Tiranës, në kopshtin 34 (në zonën e Kombinatit) mes të tjerave u konstatuan edhe: myk dhe lagështi në mure, mungesa e mobilimit të brendshëm, fjetja në krevatë marinari, ngrohja me sobë drush, problemet me sistemin elektrik, mungesë mjetesh didaktike, mungesë tapetesh etj (lexo këtu).
Ndërkohë, nga ana e tyre, prindërit patën pranuar se pamundësia ekonomike ishte e vetmja arsye që i detyronte t’i çonin fëmijët në kopshtin nr. 34, ndonëse më shumë se u jep dije, ky kopësht i ”rrezikon shëndetin”.
Pas kontrollit të ushtruar nga Autoriteti Kombëtar i Ushqimit, TFL iu drejtua atij me një kërkesë zyrtare lidhur me konstatimet e gjetura dhe masat e ndërmarra, ku u evidentuan sërish problematikat e ngritura më parë, kompetente për AKU-në.
Kopshti 34 është inspektuar me datë 16.05.2017 dhe magësitë e konstatuara kanë qenë:
- Prani lagështire në një pjesë të murit.
- Ambjentet e kuzhinës të palyera
- Pajisjet e kuzhinës duhet të rinovohen.
Ndërkohë që për mangësitë e konstatuara AKU sqaron edhe masën administrative ”Paralajmërin për mbyllje”. Nga ana e gazetës “Shëndet+” u kontaktua edhe drejtoresha e kopshtit nr. 34, Silvana Stefa, e cila u shpreh se Autoriteti Kombëtar i Ushqimit kishte ardhur në kopsht dhe kishte kërkuar ta mbyllte për shkak të kushteve të këqija, të cilat ajo pranoi se u raportuan edhe gjatë monitorimit të kryer nga shoqata “Together for Life”, por edhe u denoncuan nga vetë prindërit, të cilët u shprehën se myku, lagështia, sobat me dru, kushtet në përgjithësi të këtij kopshti rrezikonin shëndetin e fëmijëve të tyre, të cilët i çonin shpesh për kurim. Stefa tha se tashmë prisnin ndërhyrjen e Bashkisë së Tiranës për kopshtin e tyre.
Vetë AKU, si autoriteti përgjegjës, kryen inspektime 4 herë në vit në kopshte për verifikim të kushteve higjieno-sanitare në ambientet dhe pajisjet që përdoren në përgatitjen e ushqimit, si dhe dokumentacionin shoqërues për produktet ushqimore.
Nga ana e saj, shoqata “Together for Life”, e cila po zbaton projektin “Lëviz për kopshtin tim” të mbështetur nga LëvizAlbania, ka denoncuar raste të ndryshme të problematikave të hasura në 43 kopshtet publike të Tiranës.
“Ky botim u realizua me mbështetjen e LëvizAlbania. Mendimet dhe opinionet e shprehura në të i përkasin autorëve dhe nuk përkojnë domosdoshmërisht me qëndrimet e LëvizAlbania”./ Shendeti.com.al
