Përshtati në shqip për “Shëndeti.com.al”: Blertina Koka
Është vetëm 10 muajsh dhe i është dashur të luftojë çdo ditë me vdekjen. Lennox Smith është padyshim vogëlushi më luftëtar në botë! Ai ka kaluar deri tani 5 infarkte kardiake, për shkak të një defekti në zemër. Nëna e tij, Laura Knight, 21 vjeç, tregon se djali pas çdo infarkti zgjohej duke qeshur.
“Ai ka fituar beteja që do të kishin mposhtur edhe një të rritur. Ai është luftëtari im i vogël frymëzues”, shprehet ajo.
Vogëlushi Lennox ka lindur me sindromën “hypoplastic”, një defekt që pengon zhvillimin e pjesës së majtë të zemrës. Kjo gjendje pengon qarkullimin normal të gjakut tek zemra. I mituri ka pësuar infarktin e parë kardiak kur ishte vetëm 12 ditësh.
Prindërit e tij u informuan për defektin që para se të lindte, por nuk pranuan që ta abortonin.
“E dija që nuk mund t’ia shëroja asnjëherë zemrën, por e di sa shumë dashuri mund t’i dhurojmë dhe e di që do të jemi pranë të tij në çdo moment”, rrëfen nëna e vogëlushit.
“Ai mund të jetë akoma një foshnje, megjithatë Lennox na ka mësuar kaq shumë gjëra për jetën. Ai po shkruan librin e tij të mbijetesës”, shprehet babai i tij.
Burimi: Mirror / https://shendeti.com.al/
