Përshtati në shqip për “Shëndet+”: Daniela Bardhi
A përbën vërtet rrezikshmëri për shëndetin martesa midis kushërinjve? Kjo është një çështje që shkakton debat sa herë që vihet në diskutim.
Disa kultura bëjnë thirrje: “Ndalini martesat brenda gjakut”, ndërsa disa të tjera (që kinse duken më të civilizuara) e përkrahin këtë fenomen me arsyetimin se “mund të ekzistojë një element madhor që mund t’i përkrahë këto martesa, përfshirë këtu dashurinë midis çiftit apo lindjen e një fëmije”.
Sipas studimeve të bëra, mbi një miliard njerëz në mbarë botën thuhet të jenë martuar “brenda gjakut”.
Tradita i lejon njerëzit e Pakistanit, Azisë Jugore dhe disa vendeve të Lindjes së mesme të lidhin martesë brenda gjakut. Ndërsa ligji në Shqipëri e lejon për “arsye madhore”.
Por studimet dhe shkencëtarët i thonë NDAL këtij fenomeni! Kjo për shkak se rrit rrezikun për t’u prekur nga sëmundjet gjenetike. Ekspertët thonë se ky rrezik po rritet çdo ditë e më shumë.
Profesor Alan Bittels, drejtor i “Qendrës për Gjenetikën Njerëzore” në Perth, Australi, thotë se numri i vdekshmërisë foshnjore në fëmijët e lindur nga kushërinjtë e shkallës së parë deri në atë të katërt është rreth 1.2%. Defektet e lindjes rriten në një shifër 2-4%. Profesori shton se disa nga sëmundjet më të shpeshta dhe më të zakonshme që prekin fëmijët që kanë lindur nga prindër në lidhje gjaku janë: verbëri, shurdhim, sëmundje të lëkurës dhe probleme neurodegjenerative. Sa më e afërt të jetë shkalla e lidhjes së gjakut të prindërve, aq më të shpeshta janë çrregullimet e mutacioneve gjenetike. Fatkeqësisht, sëmundjet e këtyre fëmijëve nuk mund të kurohen, as shërohen! / Burimi: BBC
