Përshtati në shqip për “Shendeti.com.al”: Fize Smailaj
Një nënë po paralajmëron prindërit e tjerë mbi rreziqet potenciale të puthjes së bebeve, pasi e ka pësuar vetë me foshnjën e saj vetëm 14-muajsh. 30-vjeçarja Amy Stinton tregon se i është dashur ta shtrojë menjëherë në spital djalin e saj Oliver, pasi filluan t’i shfaqeshin flluska të dhimbshme në këmbë, kofshë, krahë dhe rreth buzëve, të gjitha këto vetëm për shkak të një puthjeje.
Pas kryerjes së analizave të nevojshme, djali rezultoi që ishte prekur nga herpesi i tipit 1, që mund të shkaktojë plagë në gojë, skuqje dhe temperaturë.
Tani ai është në gjendje të mirë shëndetësore, por virusin do ta ketë gjatë gjithë jetës së tij. Ky virus transmetohet zakonisht nëpërmjet gojës ose puthjeve.
Oliver ka vuajtur nga ekzema në moshë më të vogël, si pasojë e alergjisë që ai kishte nga qumështi, por nëna e tij vendosi ta çojë në spital kur gjendja e tij u përkeqësua. Mjekët i thanë se djali kishte një infeksion dhe e këshilluan të merrte një krem për këtë problem. Ditën tjetër simptomat e djalit u përkeqësuan dhe nëna u detyrua ta çojë sërish pranë mjekëve. Testet konfirmuan se ai ishte mbartës i Herpesit tipi 1, që është edhe shkaktari i flluskave rreth buzëve. Nëna e tij shprehet se ishte shumë e vështirë ta shihte të birin në atë gjendje, lëkura e tij çahej kur ai vraponte.
“Ishim me fat që e çuam pranë mjekëve në kohë. Nëse do të ishim vonuar, pasojat do të kishin qenë të mëdha, ndoshta mund të kishte vdekur”, thotë nëna e tij.
Burimi: Daily Mail / https://shendeti.com.al/
