Pirja e rregullt e ‘koktejleve’ proteinike mund të rrisë rrezikun e kancerit vdekjeprurës të zorrës së trashë, paralajmëron një mjek i shquar i kancerit.
Gjatë 30 viteve të fundit, diagnozat e sëmundjes tek të rinjtë janë rritur me 80% në të gjithë globin, sugjerojnë studimet.
Shkencëtarët kanë sugjeruar se një sërë faktorësh mund të qëndrojnë pas këtij fenomeni, nga obeziteti te grimcat e padukshme të plastikës në ujin e pijshëm.
Por tani një obsesion “i pashëndetshëm” me pluhurat e proteinave është lidhur gjithashtu me një rrezik në rritje të kancerit të zorrëve.
Dr. James Kinross, një kirurg kolorektal në Imperial College London, tha për LadBible se ata që përdorin suplementet popullore mund të rrisin rrezikun e inflamacionit që shkakton kancer.
“Këto pluhura proteinash janë të dëmshme për zorrët tuaja. Kur trupi juaj zbërthen dhe metabolizon proteinat, një nga nënproduktet janë toksinat të cilat nxisin inflamacionin dhe shkaktojnë kancer të zorrëve”, tha ai.
Më tej shtoi se pluhurat e proteinave—të njohura midis atyre që shkojnë në palestër, e ndryshojnë thellësisht mikrobiomën e zorrëve, duke shkaktuar inflamacion dhe duke çliruar toksina.
Këto komponime të dëmshme rrisin rrezikun e dëmtimit të ADN-së në qeliza, gjë që nga ana tjetër rrit mundësinë që ato të shndërrohen në kancerogjene, kanë paralajmëruar ekspertët.
