Pas një periudhe të mbushur me pasiguri dhe debat, studiuesit e kancerit po raportojnë zhvillime inkurajuese në përdorimin e teknologjisë mRNA për trajtimin e sëmundjes.
Historia e Vita Sara Blechner, një bibliotekare nga Oceanside, New York, pasqyron sfidat dhe shpresat që lidhen me këtë fushë. Në mars të vitit 2020, vetëm pak ditë para se pandemia Covid-19 të mbingarkonte spitalet në New York, ajo u diagnostikua me kancer në pankreas – një nga format më agresive të kancerit, me shkallë të ulët mbijetese.
Përballë mundësive të kufizuara, Blechner dhe familja e saj u orientuan drejt një fushe inovative në zhvillim: terapitë me mRNA. Kjo teknologji, e njohur gjerësisht për përdorimin në vaksinat kundër Covid-19, ka qenë prej kohësh në fokus të kërkimeve për trajtimin e kancerit.
mRNA (ARN mesazhere) është një molekulë që transmeton informacionin gjenetik nga ADN-ja për të udhëhequr prodhimin e proteinave. Kompania gjermane BioNTech, e cila bashkëpunoi me Pfizer për vaksinën kundër Covid-19, kishte vite që zhvillonte platforma të bazuara në mRNA për trajtimin e kancerit.
Megjithatë, suksesi i vaksinave kundër Covid-19 u shoqërua edhe me reagime politike, të cilat gjatë vitit të fundit kanë rrezikuar të ngadalësojnë zhvillimin e dhjetëra trajtimeve të mundshme për kancerin.
Pavarësisht kësaj, ekspertët thonë se ka arsye për optimizëm. Sipas Elizabeth Jaffee nga Qendra Gjithëpërfshirëse e Kancerit Sidney Kimmel në Universitetin Johns Hopkins, provat e hershme klinike kanë dhënë rezultate pozitive.
Ndërkohë, Catherine Wu nga Dana-Farber Cancer Institute dhe Harvard Medical School thekson se rezultatet inkurajuese kanë shtyrë Institutin Kombëtar të Kancerit në SHBA të njoftojë një fond prej 200 milionë dollarësh për zhvillimin e vaksinave të reja kundër kancerit, ku teknologjia mRNA zë një vend kyç.
Zhvillimet e fundit sugjerojnë se, pavarësisht sfidave, kërkimi mbi vaksinat mRNA për kancerin po vazhdon të ecë përpara me ritme premtuese.
