Dr. Elton Peci, mjek obstetër-gjinekolog
Në dekadat e fundit evidentohet një tendencë mbarëbotërore e rritjes së infertilitetit mashkullor. Studime të shumta kanë faktuar këtë tendencë, ndërkohë që të tjera studime po mundohen të hedhin dritë mbi shkaqet. Më i theksuar ky trend duket në Evropë dhe në Amerikën e Veriut, ku nivelet e spermës në 50 vitet e fundit janë përgjysmuar, dhe trendi i rënies së vlerave të spermiogramës është me 1.5 – 2 % në vit. Në praktikën tonë ditore, nëse krahasojmë numrat e spermiogramës (përqendrimi, lëvizshmëria dhe morfologjia) përpara 10 viteve me ato të ditëve të sotme, vihet re një rënie me 20 – 30 %. Një në dy spermiograma që tashmë analizojmë është me probleme. Rritja e infertilitetit mashkullor rrezikon të shndërrohet kështu në një problem serioz të shëndetit publik.
Arsyet se përse po ndodh ky fenomen ende janë të panjohura, por sugjerimet janë se ky fenomen fillon që përpara lindjes; pra që në barkun e nënës. Faktorët që mund të prekin gratë shtatzëna janë dieta dhe ekspozimi ndaj lëndëve toksike të cilat mund të kenë një efekt negativ në zhvillimin e sistemit riprodhues të fetusit mashkull. Thuajse çdo aspekt i jetës moderne – që nga telefonat celularë, duhani dhe konsumi i alkoolit janë akuzuar si agjentë me afekt negativ mbi spermatozoidet.
Shekulli XX është shekulli i revolucionit në industri, ku përdorimi i naftës dhe i plastikës janë kryefjala e këtij revolucioni. Tashmë lëndë kimike me prejardhje nga përpunimi i naftës apo degradimi i plastikës janë aq të përhapura, sa kanë filluar të hyjnë në zinxhirin ushqimor, duke ndikuar edhe në hormonet tona – përfshirë këtu estrogjenet dhe testosteronin.
Po jo vetëm kaq; efekti negativ i lëndëve toksike, rrezatimit apo edhe mënyrës së jetesës, mendohet të ketë ndikimin e tij edhe në rritjen paralele (tashmë fakt!) të numrit të rasteve me kancer testikular apo anomali si hipospadia apo kriptorkidizmi./JoTabu.al
